Конференцијата COP24 во Полска заврши со многу отворени прашања и прилична загриженост кога станува збор за климатските промени.
Грета Танберг е девојче кое не се предава многу лесно и со таков недвосмислен став допатувала од Шведска и одржала говор за паметење на оваа конференција. Грета живее со Аспергеров синдром, а покрај своите секојдневни училишни активности, таа се занимава и со прашањето за глобалните климатски промени и неопходните мерки кои треба да се преземат.
“Јас сум Грета Танберг. Имам 15 години и доаѓам од Шведска. Овде пред вас зборувам за вистината за климатските промени. Многу луѓе велат дека Шведска е мала земја и дека не е важно тоа што го правиме ние. Меѓутоа, јас научив дека никогаш не си толку немоќен за да не можеш да смениш нешто. Ако неколку деца можеа да добијат медиумско внимание само заради тоа што не се појавиле на училиште, замислете што може да направиме заедно, доколку тоа навистина го сакаме. За да успееме во тоа, мора да зборуваме јасно, без разлика колку е тоа непријатно”, изјавила Танберг.
“Вие зборувате само за идеите за економски раст на тема нови зелени површини ширум светот, бидејќи се плашите од лош публицитет. Зборувате само за развивање на лоши идеи кои нѐ доведоа до моменталниот хаос, дури и кога единствената разумна постапка е итно да ја повлечеме кочницата и да запреме сѐ. Не сте доволно зрели за да ја признаете оваа вистина, иако нам, на децата, нѝ го оставате тој товар. Но, мене не ми е важна популарноста, туку ми е важна вистината за климатските промени, како и нашата планета”.
15-годишното девојче порачало дека целата цивилизација се жртвува во име на една мала група луѓе која заработува огромна сума на пари.
“Се жртвува нашата биосфера, за да може богатите луѓе во мојата земја да живеат во луксуз. Патењето на мнозинството го плаќа луксузот на неколкумина избрани. Својот 75-ти роденден ќе го прославам во 2078 година и ако имам деца можеби тој ден ќе го поминам со нив. Можеби ќе ме прашаат нешто за вас. Можеби ќе ме прашаат зошто ништо не направивте, кога имало време за тоа…”
Погледнете го целиот говор на Грета:
