Една мајка од Мичиген брутално ги убила своите три ќерки, а потоа извршила самоубиство. Овој злочин ја шокираше Америка, а полицијата сега изнела детали од грозоморниот чин во јавност.
28-годишната Обријен Мур, мајка на три деца, фалсификувала лекарско оправдување за да ги задржи постарите ќерки дома, а потоа сите три деца ги одвела во шума и ги убила пред да си пресуди себеси.
Таа ги одвела децата во шумата зад куќата на прабабата и прадедото во округот Кент, Мичиген, каде ги убила со ловечка пушка, пренесува “Metro”. Телата на 2-годишната Алејна Рау, 6-годишната Кесиди Родери и 8-годишната Кири Родери ги ставила во багажникот и заминала дома, каде извршила самоубиство.
Нејзиното момче и татко на најмладото девојче ја открил стравичната сцена само еден час подоцна, пренесува “Daily Mail”.
“Не знаеме што ѝ поминувало низ глава, не оставила никакво проштално писмо. Веројатно имала сериозни психички проблеми”, вели шерифот Мишел Лаџој-Јанг.
Таа изјавила дека Обријен Мур на Фејсбук оставала пораки кои укажуваат на тоа дека била параноична и мислела дека на некој начин нејзините деца се во опасност, и дека истото довело до трагичниот настан. Според зборовите на социјалните работници, мајката повеќе пати не ги пуштала своите деца да одат на училиште затоа што наводно “слушала гласови од телевизорот кои ја предупредувале дека училишниот автобус ќе доживее несреќа”.
На Мур минатата година ѝ била дијагностицирана шизофренија и психоза, а во септември била десет дена во болница.
“Ова е еден од најтешките случаи за кои знаеме”, додала Лаџој-Јанг.
