Пејачката откри како поминало породувањето и кој го избрал несекојдневното и уникатно име за малиот наследник.
Аделина Тахири која пред повеќе од еден месец на свет го донесе Јон во интервју за “7дена.мк” откри како поминало породувањето и кој го избрал несекојдневното и уникатно име за малиот наследник.
Јас инсистирав да се породам нормално, по природен пат. Беше многу тешко ама се борев. Бев послушна мајка. Прв пат кога станав и кога го видов плачев на глас. Јон плачеше, плачев и јас. Излезе нешто од мене, се откина дел од мене. Чувство кое не се опишува. А љубовта меѓу мајка и дете е љубов на прв поглед. А можеби е и чувство поголемо и од љубовта. Кога прв пат го погледнав Јон видов дека е многу црн и измачен од породувањето. Ама каков и да беше за мене беше најубав на цел свет. Секој ден кога го гледам е се поубав и поубав. Мајките ме разбираат, знаат кога ова го кажувам дека не претерувам. Не се опишува, рекла пејачката и додала:
Идејата за ова име е заедничка, така сакавме и јас и Јоже, мојот сопруг. Јон пред се е библиско име. Мене тоа не ми пречи, иако сум муслиманка. Освен тоа Јонското море го има и во Албанија и во Грција а Јоже е Егеец од Костур. Јонското Море ги поврзува двете држави. Сакавме кратко име, име кое одговара на презимето Марков, е само тоа е причината, без никаква предрасуда. Јон личи на мајка му, искрено јас кога сум била мала сум била многу црна иста како него.
Сакале да ме крстат Бјондина, што на албански значи „русокоса“, но не се осмелиле бидејќи сум била многу црна и така ми дале име Аделина. Мислам дека синовите се на мајките, а ќерките на татковците. Премногу е мал за да се каже. Но, и да личи на Јоже, јас би била најсреќна на свет. Јоже е прекрасен човек, татко и сопруг нека биде Јон како него. Да усреќи некоја жена, да биде среќна како мене, заклучила Аделина.
Аделина зборуваше и за љубовта на нејзиниот животот, односно како им се случило најубавото нешто. Љубовта меѓу нас се роди без да знам дека сум вљубена. Јоже ми беше многу добар пријател. Година и пол ме молеше да одиме на кафе. Не дека јас се занесував, но само што излегов од врска и немав потреба да се запознавам со никој, раскажува Аделина Тахири.
Атрактивната пејачка конечно проговори за бракот со познатиот адвокат Серјожа Марков кој сензационално одекна во јавноста, особено поради тоа што станува збор за партнери од различна националност.
– Еден ден му реков: Јоже, јас треба да избирам меѓу тебе и татко ми и брат ми. Тие нема да прифатат. Тој, пак, ми одговори: Аделина, животот е многу краток и треба да го правиш тоа што ти го чувствуваш. Секако, одлучив да бидам со него. Зошто треба да имам предрасуди? Зошто треба да живеам за туѓи животи? Секако дека треба да живеам за себе. Моите многу добро го прифатија и тој и татко ми сега се многу блиски. Јас навистина сум многу среќна жена – појаснува Тахири.
Ова е втор брак за нејзиниот избраник, во јавноста познат како поранешен адвокат на Сашо Мијалков и брат на сопругата на Иво Котевски. Пред пет години Марков беше избран за Почесен конзул на Република Молдавија во Република Македонија.
