Од Европската комисија, на чие чело е Жан Клод Јункер, на прашање од унгарските медиуми во врска со случајот на поранешниот македонски премиер Никола Груевски одговориле дека истиот не треба да се политизира и оти очекуваат сите страни да дејствуваат исклучиво во согласност со правните прописи.
Како што пренесува порталот Hungary today, според Комисијата, македонските власти успеале да го зајакнат владеењето на правото во земјата.
Портпаролот на Комисијата рекол оти е свесен за случајот на Груевски, но дека според законодавството на ЕУ, земјите членки самостојно разгледуваат и одлучуваат по индивидуалните апликации за азил.
I take note of reports about #Hungary’s decision to grant political asylum to @GruevskiNikola. If confirmed, I expect a sound explanation of its grounds by @Viktor_Orban. 1/2
— Johannes Hahn (@JHahnEU) November 21, 2018
Сепак, Комисијата очекува секоја од страните да дејствува строго во согласност со правилата, без притоа случајот да се политизира бидејќи, како што наведуваат оттаму, владеењето на правото е водечки принцип и во земјите членки и во земјите кандидати.
Од Европската комисија исто така велат дека изненадувачки е тоа што Унгарија го поддржува членството на Македонија во ЕУ, но смета дека земјата не е безбедна.
Претходно, унгарската влада забележа дека случајот на Груевски го смета исклучиво за правно прашање, а не политичко.
The #RuleofLaw remains a fundamental principle for Member States and accession candidates alike. It is crucial for #Europe’s credibility. Surprising that #Hungary supports ?? #EU membership but does not consider it safe. 2/2
— Johannes Hahn (@JHahnEU) November 21, 2018
Иако Комисијата не одговорила директно на прашањето од унгарските медиуми за тоа дали ќе расправа за случајот на Груевски со унгарската влада или не, оттаму застанале зад твитот на европскиот комесар за проширување, Јоханес Хан, кој тој го сподели во средата.
Еврокомесарот напиша дека доколку е потврдена информацијата оти Унгарија одобрила азил за Никола Груевски, тој од Виктор Орбан очекува солидно објаснување за основите на азил.
