Во вчерашното гостување во емисијата “200” на Алсат ТВ, премиерот Зоран Заев рече дека го знае човекот кој му ги направил двете лузни на лицето, но и дека не го пријавил.

“Тој што ја направи најголемата лузна и оваа другата, апсолутно не е фатен во ниеден процес заради тоа што не го фатиле камерите. Јас го знам кој е човекот, што требаше сега? Да го пријавам? Има две деца, не е фатен” – изјави Заев во дел од неговите одговори. Тој во емисијата зборуваше и за амнестијата и за процесот на помирување. 

Мијалков ги охрабрувал пратениците да гласаат за промена на името

Во истото интервју, премиерот призна дека ексдиректорот на УБК, Сашо Мијалков, лично разговарал со 8-те одбегани пратеници од ВМРО-ДПМНЕ и им вршел притисок да гласаат за промена на уставното име.

„Сашо Мијалков зборуваше со пратеници заради тоа што верува во тоа решение. Тоа го кажуваше на сите, јавно се зборува во Скопје, насекаде, дека тој зборувал со пратениците. Седел со нив, ги охрабрувал, лично верувал“, рече Заев. 

Во однос на притворот на Сашо Мијалков, Заев и тука вели дека можело да се случи да не биде притворен ако бил во интерес на политичкиот процес.Ова негова изјава наведува на сомнеж дека власта иако тврдеше, и понатаму има влијание врз судските одлуки. 

„На сред процес тој беше притворен. Зошто? Правниот систем си ја гледа својата работа. Ако тоа беше во функција на политиката, ќе го оставеа тука за да помогне“, додава Заев. 

Понатаму Заев изјави дека и за бегството на Никола Груевски можела да се реши работата со кревање слушалка кај судија. 

„Го оставивме процесот да тече. Можевме да се јавиме на судија, да го одложи, да не го осудат“, рече тој. 

Пратеничката Елизабета Канческа-Милеска на нејзиното последно судење ја убедуваше јавноста дека таа гласала за Северна Македонија по сопствено убедување и дека никој не ѝ извршил притисок. И на денот на гласањето Канческа-Милеска се правдаше дека гласот дава за европската иднина на државата и ги прозва пратениците од ВМРО-ДПМНЕ дека ги кочеле процесите. 

Инаку, пред да се изгласаат уставните измени, имаше обид за промена на член од Кривичниот законик, со кој од вина би се ослободиле пратеници и поранешни функционери против кои се водат постапки од страна на специјалното јавно обвинителство. Промените на кривичниот законик не поминаа, но според извори на „Макфакс“, ќе се бара друго законско решение, пратениците кои се осомничени, а избегаа од ВМРО-ДПМНЕ да не одговараат пред лицето на правдата.