Путин неколку пати повторил дека Русија дефинитивно има надворешни сојузници.

Русија не е членка на НАТО алијансата, но сепак има силни политички и економски партнери ширум светот. Некои од нив дури и се обврзани да ја поддржат Русија во случај на војна. 

“Русија има само два сојузници: својата војска и морнарица”, имал обичај да каже царот Александар Трети, руски император. Овој цитат од 19-тиот век често се користи кога луѓето нагласуваат дека на меѓународната сцена, посебно во тешки времиња, Русија ќе може да се потпре само на себе. Меѓутоа, ова не значи дека Русија нема земји кои може да ги нарече свои пријатели.

Дури и претседателот на Русија, Владимир Путин, го цитирал царот Александар Трети кога одговарал на прашања за сојузниците на Русија во 2015-та година, иако брзо објаснил дека се шегува и дека Русија дефинитивно има странски сојузници. Но кои се тие?

Пост-советски сојузници

Зборувајќи за земјите со кои Русија има правно-обрзувачки договори за меѓусебна одбрана, тука пред се влегуваат членовите на Организацијата “Договор за колективна безбедност” – “ODKB”, меѓувладин сојуз создаден во 1992-ра година, кој сега обединува шест пост-советски држави – Русија, Ерменија, Белорусија, Казахстан, Киргистан и Таџикистан.

Според повелбата на “ODKB”, меѓу нејзините цели е “давање на колективна заштита во случај за загрозување на безбедноста, стабилноста, територијалниот интегритет и суверенитет” на државите членки.

Во документот се нагласува дека членовите преферираат политички средства за постигнување на целите на групите, но ODKB може да се пофали и со комбинирани воени сили кои бројат околу 25.000 војници.

Силите на ODKB никогаш не биле повикани во борба, но организацијата спроведува редовни воени вежби. Одговарајќи минатата година на прашањето кои се руски сојузници, портпаролот на Кремљ, Дмитриј Песков, прво ги споменал членките на оваа организација.

Двете други земји кои имаат правно-обрзувачки договори со Русија се Абхазија и Јужна Осетија, две самопрогласени републики, признати само од пет членки на ОН, меѓу кои и Русија.

Москва им гарантира заштита на овие републики и тие, за возврат, се должни да и помогнат на Русија во случај на напад, иако нивните воени способности се далеку поскромни, истакнува “Russia Beyond”.

Земји кои Русија ги смета за сојузници

Иако со овие земји Русија има воени договори, постојат и уште некои држави кои се нарекуваат руски сојузници, иако со нив нема официјални договори.

Меѓу нив е и Сирија, а Русија му помага на Башар Ал АСад и во воена и во политичка смисла.

“Секако, Сирија е наш сојузник. Но, колку што јас знам, ние немаме документ за сеопфатни сојузнички односи”, рекол Песков.

Друг пример е Кина: азискиот економски гигант е член на БРИКС и Шангајската организација за соработка, сојузи во кои Русија исто така е член.

Покрај тоа, руската војска редовно одржува заеднички воени вежби со своите кинески колеги. Коментирајќи една таква вежба во 2018-та година, Песков ја нарекол Кина сојузник.

Аналитичарите, од друга страна, веруваат дека ова би можело да биде претерување. Како што рекол Сергеј Караганов, кој е на чело на Сојузот за надворешна и одбранбена политика, “нашите земји се повеќе се доближуваат, но воен и политички сојуз е невозможен”.

“Русија не сака да биде кинески помлад партнер и не можеме да бидеме постар. Работите се добри какви што се”, истакнал тој.

Индија може да се нарече втор потенцијален сојузник, а на многу начини, руско-индиските односи се слични на руско-кинеските. Индија исто така е дел од БРИКС и ШОС, одржува воени вежби со Русија и купува руска воена опрема, но тука се наидува на некои проблеми.

Како што рекол политичкиот аналитичар Александар Крамчикин, “Русија се обидува да ја стави Индија во трилатерален сојуз со Кина, додека и е потребен и сојуз против Кина”.

Односите во оваа триаголник се прилично комплицирани, а на крајот на краиштата, сите држави на прво место ги ставаат своите интереси.