Николас Мадуро го предупреди Доналд Трамп дека ќе биде виновен за крвопролевањето како во Виетнам, доколку САД воено се вклучи во венецуеланските внатрешни проблеми.
Мадуро порача дека доколку САД воено се вклучат во конфликтот во Венецуела, тогаш и Доналд Трамп ќе биде виновен за крвопролевањето кое што ќе биде како во војната во Виетнам. Претседателот на Венецуела потенцијалниот конфликт притоа го опиша како „Давид против Голијат“.
Претседателот на Венецуела употреби цитати од Библијата и ги спомена американските воени неуспеси со цел да ги одврати властите од Вашингтон од превземање на воена акција против неговата власт.
„Стоп. Застани Трамп. Застани таму. Правите грешки кои ќе ви ги прекријат вашите раце со крв. Вие ќе го напуштите претседателскиот мандат со крвави раце“, изјави Мадуро, потенцирајќи дека таквата војна за САД би значела „нов Виетнам“.
Потенцијалниот воен судир помеѓу САД и Венецуела, Мадуро го опиша како борбата помеѓу Давид и Голијат, борба поради која што, според него, Трамп ќе зажали.
„Ако не нападне северноамериканската империја, ќе мораме да се браниме. Нема да ја предадеме Венецуела. И ние имаме свои тајни“, порача Мадуро кој што додаде дека Американците наместо боксерски ракавици, ќе користат чекан.
Според Мадуро, властите на САД сакаат тој да биде отстранет од власт за да ја превземат контролата над големите залихи на нафта во Венецуела.
