Шпанскиот спортски магазин “Marca” објави приказна во која се тврди дека фудбалската ѕвезда, Кристијано Роналдо, е купувач на Bugatti La Voiture Noire – најскапиот автомобил на светот.
Извршниот директор на брендот, Стефан Винкелман во текот на официјалното откривање изјавил дека автомобилот е веќе продаден, но не сакал да го открие идентитетот на купувачот. Исто така, тој објавил дека никогаш повеќе нема да биде произведен ниту еден автомобил како тој, како и дека новитетот е продаден по цена од 16,7 милиони евра.
Единствениот проблем во целата приказна? Купувачот не е Роналдо бидејќи неговиот портпарол ја демантирал целата приказна.
Сепак, не би погрешиле кога би помислиле дека купувачот на најскапиот автомобил е всушност Роналдо, бидејќи тој дефинитивно претпочита скапоцени суперавтомобили, особено оние на брендот Bugatti. Фудбалерот има најмалку 19 автомобили во својата гаража, вклучувајќи и Bugatti Veyron, Bugatti Chiron, Bentley Continental GTC, Bentley GT Speed, Ferrari 588 GTP Fiorano, Ferrari 599 GTO, Ferrari F430, Porsche 911 Carrera 2S, Audi R8, Audi RS6, Lamborghini Aventador и Rolls-Royce Phantom.
Продажбата на La Voiture Noire се држеше во тајност и била насочена само кон главните клиенти на Bugatti, така што не можеме да знаеме кој точно бил купувачот. Сепак, некои тврдат дека сега веќе славниот модел отишол во рацете на Фердинанд Пих, некогашен директор на групацијата Volkswagen, кој е сопственик на Bugatti. Боксерот Флојд Мејведер е исто така еден од потенцијалните купувачи.
Судејќи по сè, мора да почекаме и да видиме кој е вистинскиот купувач. Моделот кој беше претставен во Женева не бил функционален, така што Bugatti има рок од неколку години да произведе “вистински” автомобил, а сите се надеваат дека неговата достава, планирана за 2021 година, ќе го открие и името на сопственикот.
