На состанокот на главните советници за безбедност со претседателот на САД кој бил одржан минатиот четврток, пред Доналд Трамп бил претставен планот за евентуален судир со Иран.
Наводно вршителот на должноста министер за одбрана, Патрик Шанахан го претставил „освежениот“ воен план кој предвидува испраќање на 120 илјади американски војници на Блискиот исток во случај Иран да ги нападне силите на САД или да го забрза процесот за создавање на нуклеарно оружје.
Ова синоќа го објави „Њујорк Тајмс“, повикувајќи се на неименувани високи функционери од администрацијата на Доналд Трамп. Наводно ревизијата на планот ја наредил советникот за национална безбедност на Трамп, Џон Болтон.
„Тие не повикуваат на копнена инвазија на Иран, за која што би биле потребни значително повеќе војници“, открива споменатиот медиум.
Од „Њујорк Тајмс“ додваат дека ова уште еднаш укажува на големото влијание на Џон Болтон, кој што тежнеел кон судир со Иран уште во времето на претседателот Џорџ Буш Помладиот кој пред една деценија ги игнорирал неговите слични совети.
Според „Њујорк Тајмс“ засега не може да се каже дали Трамп, кој инаку настојуваше да ги извлече Американците од Авганистан и Сирија, сега навистина да донесе одлука да испрати толку голем број на американски сили на Блискиот исток.
Исто така, наводно не било јасно дали на Трамп му била соопштена и точната бројка која се планира да се испрати на Блискиот исток доколку дојде до воен судир помеѓу САД и Иран.
