Според најновото истражување, Јапонија и Сингапур имаат најмоќни пасоши, а Македонија на оваа листа се наоѓа на 46-тото место.
Според најновото истражување на компанијата “Henley&Partners”, Јапонија и Сингапур имаат најмоќни пасоши.
Овие две азиски држави се пласирале на врвот на листата благодарение на можноста за патување без виза во дури 189 светски земји.
Кога станува збор за земјите од нашиот регион, Словенија е на 10-то место, Хрватска на 20-то, Србија на 41-во, Македонија на 46-то, Црна Гора на 47-мо, а БиХ на 51-во место.
Јужна Кореја паднала од првото место и на втората позиција им се приклучила на Финска и Германија. Секоја од тие три земји овозможува патување без виза на 187 дестинации ширум светот.
На трето место се Данска, Италија и Луксембург, со чии пасоши без виза може да се посетат 186 држави, а следат Франција, Шпанија и Шведска со 185 држави.
Австрија, Холандија, Португалија и Швајцарија го делат петтото место, а на шестото место се наоѓаат дури седум држави – Велика Британија, САД, Белгија, Канада, Грција, Ирска и Норвешка.
Најголем напредок забележале ОАЕ, кои за прв пат во историјата на ова истражување влегле во топ 20 и оваа позиција ја делат со Сан Марино и Хрватска, која е најслабо рангирана држава од Европската унија.
На дното на листата се Пакистан, Сирија и Ирак, а Авганистан, со чиј пасош може да се посетат само 25 држави без виза, се наоѓа на последно место.
Компанијата “Henley&Partners” и оваа година спроведува истражување за тоа колку се моќни патните исправи на некои земји, а резултатите се темелени на податоците од Меѓународната асоцијација за воздушен сообраќај.
