На 6-ти ноември 1996 година, во преполната сала “Јане Сандански“, МЗТ Скопје го победи големиот Реал Мадрид со 69:68. Со овој фантастичен подвиг “металците” го остварија најголемиот триумф во македонската клупска кошарка. Овој датум со златни букви е запишан во историјата на МЗТ Скопје Аеродром, откако на денешен ден пред беше остварена најголемата победа досега, против “кралскиот клуб” во рамки на Еврокупот во организација на ФИБА Европа.
Најдобрите денови на МЗТ Скопје, се случуваа во тогашната легендарна “лименка” (како што ја нарекуваа) салата “Јане Сандански“, која беше претесна да ги собере сите кои сакаа да го гледаат тимот од Аеродром во живо.
Најголемата победа се случи на денешен ден, кога апсолутниот фаворит, беше предводен од еден од најдобрите стратези на сите времиња, легендарниот Жељко Обрадовиќ. Во својот ростер го имаа Дејан Бодирога, без никаков сомнеж еден од најдобрите кошаркари кој некогаш се појавиле на европско тло. “Белиот Меџик” (како што го нарекуваат српкиот репрезентативец) со наведната глава си замина од Скопје. Легендарните слободни фрлања на Перо Блажевски во последните секунди никогаш нема да бидат заборавени. Пеколот во “лименката“, во која имаше речиси двојно повеќе луѓе од предвидениот капацитет, беше ненадминлива пречка за ѕвездите на “кралскиот клуб”. Резултатот беше 69-68 во корист на сино-белите. Двете прецизно изведени слободни фрлања на Перо Блажевски на неколку секунди до крајот сравија крај на мечот и ја формираа најубавата клупска кошаркарска бајка која му се случила на нашиот главен град. Овој триумф силно одекна во тогашна кошаркарска Европа и дефинитивно го стави нашиот клуб на мапата како едно од најголемите изненадувања кој некогаш се случиле на стариот континент.
Херојот Блажевски со 22 поени (со перфектни 4/4 за тројка) беше најпрецизен кај МЗТ Скопје на овој меч. Мирза Куртовиќ постигна 15, Врбица Стефанов 14, а Американецот Марк Дин 11 поени со 7 скокови. Зад името на Игор Михајловски останаа запишани 4, а Ѓорѓи Књазев постигна 3 поени. Минутажа добија и Тони Симиќ и Дејан Димов, а на клупата останаа Антонио Миневски и Борис Нешовиќ. МЗТ Скопје таа вечер беше “кралски клуб” кој испиша незаменлив клупски историски триумф!
Димитар Младеновски
