Србите слават: Јокиќ со чудесна игра му ја „украде“ победата на Лука Дончиќ (ВИДЕО)

653

Пресметката помеѓу двете најголеми кошаркарски ѕвезди на Балканот, а кои полека го освојуваат и целиот свет, Никола Јокиќ и Лука Дончиќ, донесе фантастична средба во која Денвер нагетс на Србинот буквално му ја „украде“ победата на Далас маверикс (107-106) за кој настапува Словенецот.

„Телињата“ имаа добиен натпревар, со оглед на водството во најголемиот дел од средбата, како и со плус пет (106-101) на сто секунди до крајот. Тогаш на сцена стапи Јокиќ, кој ги постигна четирите клучни поени, меѓу кои и победничките на осум секунди до крајот, додека Дончиќ промаши дури два обиди за да му донесе триумф на својот тим.

Српскиот ас средбата ја заврши со 33 поени, од кои дури 27 постигна во второто полувреме, на кои додаде шест скока и седум асистенции. Словенецот, пак, средбата ја заврши со 27 поени, девет скока и десет асистенции.

На останатите средби од синоќешната програма во НБА, кошаркарите на Сан Антонио спарс славеа на гости против Бостон селтикс (129-114), Торонто репторс по продолжение беше подобар од Шарлот хорнетс (112-110), додека Мајами хит на гости ја победи Индијана пејсерс со 122-108. Орландо меџик беше поуспешен од Вашингтон (123-89), Хјустон рокитс како гостин славеше против Атланта хокс (122-115), Њу Орлеанс пеликанс го победи Чикаго булс (123-108), Јута џез беше подобра од Њујорк никс (128-10), додека Милвоки бакс славеше на гостински терен против Голден стејт вориорс (107-98).