Кога Австралијанецот Ендрју Флиндерс Тејлор рекол дека ќе премине на исхрана која вклучува само компири и дека таквата исхрана ќе ја практикува цела една година, многумина помислиле дека е луд, вклучувајќи ги и неговите членови на семејството и пријателите.
Ослабнал 50 килограми
Меѓутоа, таткото на две деца од Мелбурн бил истраен во својот потфат и изгубил неверојатни 50 килограми.
Повеќето доктори, нутриционисти и експерти за исхрана не би препорачале практикување на таков рестриктивен план – исхраната би требало да се темели на урамнотежен внес на протеини, јаглехидрати, овошје, зеленчук, млечни производи и масти.
Како успеала компир диетата кај Ендрју?
Важно е да се нагласи дека Австралијанецот го прифатил предизвикот по изучување на научни мислења и финализирање на својот план со помош на доктор.
“Добивав 600 отсто дневни потреби за железо и над 400 отсто од препорачаната доза на витамин Ц, заедно со многу влакна и сето она за кое ми велеа дека ќе ми недостасува во организмот”, изјавил тој.
Единствената работа поради која се грижел бил внесот на калциум бидејќи иако делумно го има во компирот, тоа не е доволно. За да биде сигурен дека го внесува во доволна количина, правел компир пире со соино млеко надополнето со тој минерал, пишува “Men’s Health”.
Експертите за неговиот план на исхрана велат дека не е “потполно опасен”, иако не е најздравата исхрана на светот. Нутриционистот Ријанон Ламберт го нарекува компирот “нутритивен грал”, објаснувајќи дека овој зеленчук е полн со влакна и го заситува организмот.
“Што се однесува до цената и крвниот притисок, ништо не може да го замени стариот добар компир”, вели Џоан Салге Блејк, професор на клиничкиот универзитет Бостон.
Сè уште сака компири
Компирите ги содржат сите есенцијални аминокиселини кои се потребни за изградба на протеини, закрепнување на клетките и борбата со болестите, но јадењето на бел компир сепак предизвикува недостиг на витамини. Поради тоа Тејлор консумирал и сладок компир кој му бил еден од петте оброци на ден, а е богат со витамините А, Е и Ц.
И покрај ваквата диета, Австралијанецот вели дека и денес сака компири.
“Моето здравје се подобрува. Имав висок холестерол, но сега тој е низок, ми се намали и крвниот притисок како и нивото на шеќер. Секој пат кога правам крвна анализа, наодите се сè подобри”, вели тој.
