Пандемијата на коронавирусот дава увид во типот на глобалните здравствени закани кои ќе се појават ако планетата стане потопла, а начинот на кој ќе се бориме со неа може да влијае и на соочувањето со климатските промени, рекле здравствените експерти на Светскиот “Скол Форум” за социјално претприемништво.
“Со COVID-19, можеме подобро да ја утврдиме итноста на тоа отколку преку влијанието на климатската криза”, рекла Мандип Даливал, директорка за HIV, здравје и развој во Развојниот програм на ОН, пренесува Reuters.
Растечкото уништување на шумите и ширењето на земјоделството доведува и до климатски промени и ги доведува луѓето во контакт со болестите на дивите животни, рекла Даливал.
Американските центри за контрола и превенција на болести наведуваат дека пандемијата на коронавирусот потекнува од лилјаците, а раните инфекции се поврзани со големиот пазар на диви животни во кинескиот град Вухан.
Заканите по белите дробови како што се загадување на воздухот, предизвикани од употребата на фосилните горива кои исто така ги предизвикуваат климатските промени, ги прават луѓето ранливи на респираторни болести како коронавирусот, рекла Даливал.
Без занимавање со основните фактори кои ја прават пандемијата толку деструктивна – од недостиг на подготвеност до недоволно финансиран и кревок здравствен систем – светот “постојано ќе се нишка од епидемија до епидемија”, предупредила таа.
Али Лиз Диболд, од калифорниската фондација Скол, рекла дека вирусот понудил некои позитивни лекции за климатските акции.
“COVID-19 навистина ни покажува дека, кога човештвото ќе се обедини во заедничка цел, феноменално брзи промени се возможни”, рекла таа.
