Во светот од коронавирус се заразени речиси 2,4 милиони луѓе, вкупниот број на жртви е 161.196, а закрепнале повеќе од половина милион заболени, покажуваат последните податоци кои ги објавил сајтот “Worldometers”.
Најмногу заразени има во САД (738.923), каде има и најмногу починати (39.015).
По САД следуваат Шпанија со 195.944 заболени и повеќе од 20.000 жртви, Италија со 175.925 заболени и 23.227 починати. Франција и Германија имаат приближно ист број на заразени – речиси 150.000, со тоа што во Франција бројот на жртви е многу поголем – 19.323, во Германија 4.538.
Во светот има 210 жаришта на коронавирусот. Некои земји досега пријавиле случаи на зараза, но за среќа немаат жртви. Во Виетнам има 268 инфицирани, оздравеле повеќе од 200, Фарските Острови пријавиле 184 случаи на коронавирус, а закрепнале 173. Помал број на регистрирани заразени и без смртни случаи имаат Уганда, Макао, Малдиви, Чад, Монголија, Сејшели, Јемен, но и Ватикан.
Канада вчера најави дека границите со САД ќе останат затворени уште 30 дена. Во Канада бројот на заразени се искачи на 33.383, а бројот на починати е 1.470.
Во Велика Британија во последните 24 часа се регистрирани нови 5.525 случаи и 888 починати – вкупно има 114.217 случаи, а бројот на починати изнесува 15.464.
Шведска, земјата која едни ја фалат, а други ја критикуваат поради тоа што не вовела рестриктивни мерки со објаснување дека граѓаните на тој начин ќе стекнат колективен имунитет, во последните 24 часа забележила 111 жртви. Од коронавирус во таа земја досега починале повеќе од 1.500 луѓе. Заразени се 13.822 Швеѓани, а закрепнале 550 лица.
Од друга страна, Соломонските Острови, Микронезија, Ванату, Самоа, Кирибати, Тонга, Палау, Тувалу и Науру досега не пријавиле ниту еден случај на зараза. Помеѓу ретките земји во кои нема коронавирус се и Туркменистан и Таџикистан, како и Северна Кореја.
Многу од нив ги затвориле границите, ги забраниле патувањата и презеле чекори кои имаат за цел да го спречат ширењето на вирусот. Меѓутоа, во медиумите и на социјалните мрежи често се поставуваат прашања зошто во овие земји нема коронавирус, а за тоа се наведуваат разни објаснувања – од тоа дека овие држави се воглавно изолирани, дека немаат можност за тестирања па сè до тоа дека властите на тие земји ги кријат вистинските податоци.
