Во последните 24 часа во Словенија се потврдени 362 инфекции со коронавирусот, што е нешто помалку од вчерашните рекордни 387, изјави утрово владиниот портпарол Јелко Кацин за словенечката телевизија.
Од денес, во Словенија е во сила одлуката на владата да забрани собирање на повеќе од десет лица во јавни и приватни простории. Продавниците, поштата и сличните институции мораат да обезбедат дека во исто време нема повеќе од едно лице на 20 квадратни метри. Воведени се ограничувања за работата на баровите и рестораните, кои ќе можат да ги опслужуваат гостите само на маси, со потребното растојание, додека исто така се забранети приеми и собири каде што се служат храна и пијалаци.
Министерот за внатрешни работи Алеш Хојс синоќа изјави дека доколку новите мерки не го дадат посакуваниот резултат во наредните денови и бројот на нови инфекции не падне, тогаш владата ќе разгледа построги мерки и препораки, а можно е постепено да се затвораат фризерските салони и слични дејности, како што беше пролетва за време на првиот бран на епидемијата.
Хојс потврди дека попладнево по барање на премиерот Јанез Јанша ќе се одржи и состанок на Советот за национална безбедност, на кој ќе се разговара за епидемиолошката состојба, која е сериозна.
На прес-конференција во почетокот на неделата Јанша ги повика граѓаните да бидат одговорни и солидарни преку строго почитување на епидемиолошките правила, велејќи дека тоа ќе биде еден вид социјален тест, и дека во случај на драматично влошување на состојбата и влегување на Словенија во т.н. црвена зона се ризикува затворање со сите социјални и економски последици, што треба да се избегне.
Според планот потврден од владата оваа недела, Словенија би влегла во т.н. црвена зона и повторно би прогласила епидемија кога бројот на заразени на сто илјади жители за 14 дена ќе надмине 140, и кога ќе има повеќе од 250 заболени во болниците, од кои 50 потешко. Во тој случај, ќе бидат потребни подрастични мерки, кои може да се избегнат со дисциплинирано однесување.
