Елмас пред да заигра против Сасуоло, последен пат играше и даде гол (негов прв во Серија А) против Џенова (6-0), па после еден месец денеска според најавите треба да биде стартер во мечот со Риека во „македонското дерби“ против репрезентативниот колега Дарко Велковски.
Елмас, ланското лето дојде во Наполи за 16 милиони евра од Фенербахче, а сега првпат открива како е да се работи со темпераментниот Џенаро Гатузо, за кого вели дека е прекрасен човек.
„Јас сум пресреќен со Гатузо. Тој е прекрасен човек, обожувам да работам со него. И не ми кажува премногу работи, нешто посебно, освен дека сум – животно (се смее). Јас само се надевам дека оваа сезона ќе ми биде подобра од претходната. Сè уште сум многу млад, па морам да мислам само на работа, тренинг и напредок“, вели Елмас.
Младиот фудбалер за врска, кој може да игра на низа позиции во средниот ред, посочи дека е подготвен да одигра на ниво и со многу поголема минутажа, после неактивноста поради изолацијата предизвикана од заразата од коронавирус, кој го имаше и неговиот соиграч од средниот ред Пјотр Зиелински.
„Десетина дена не бев воопшто активен, тренирав само по дома, па сега размислувам само на теренот. Ми треба време за да се вратам во ритам, но чувствувам дека сум подготвен. Сакам да ги покажам моите квалитети. Јас сум спремен да играм, но од тренерот зависи кој ќе игра и колку минути ќе добие. Имам големи амбиции, но млад сум и треба да работам“, додава Елмас.
