Директорот на американскиот Центар за контрола и превенција на болести, Роберт Редфилд предупреди дека пандемијата на коронавирусот и натаму беснее во целата земја и ја претставува најмрачната здравствена криза во историјата на земјата.
Оваа порака на еден од најистакнатите функционери во американското здравство следуваше после прославата на Денот на благодарноста во САД кога милиони Американци сепак не ги избегнаа патувањата и семејните собири.
Покрај огромните човечки загуби, земјата се соочува и со фактот што здравствениот систем е затегнат до точка на пукање, порача Редфилд. Според неговите зборови, заразата ги достигнала сите краеви на земјата и продолжува да се шири повеќе од било кој претходен бран на пандемијата.
„Реалноста е дека декември, јануари и февруари ќе бидат многу тешки“, изјави Редфилд.
„Всушност, верувам дека тоа ќе биде најтешкиот период во историјата на јавното здравство на оваа нација“, порача тој.
До денес, повеќе од 270 илјади Американци починаа како последица на коронавирусот. Угледниот Институт за метрика и проценка на здравствената ситуација при Универзитетот во Вашингтон предвиде дека таа бројка би можела да достигне до 450 илјади до 1-ви март доколку не се почитуваат мерките како што се носење на маска и одржување на дистанца.
