Бугарите можеби тврдат дека македонскиот јазик и нација не постојат, но според нив, Македонија е земјата која има „наследен тоталитарен наратив“ и практикува говор на омраза.
Бугарските власти денеска реагираа на вчерашното соопштение на македонската Влада во кое беше критикувано ветото во Европската унија, притоа обвинувајќи дека се врши „манипулирање со вистината“.
Реакцијата на Софија следува по соопштението на Владата од Скопје во кое беше наведено дека блокадата на Бугарија е „неодговорна и тешка геостратешка грешка“, а доаѓа во пресрет на средбата на специјалниот претставник на Владата, Владо Бучковски со бугарските власти во Софија.
„Со наследен тоталитарен историски наратив, тешко е да се најде поддршка од Бугарија. Време е владата на Република Северна Македонија да се откаже од манипулативната теза дека Бугарија го оспорува правото на самоопределување и идентитетот на граѓаните на Република Северна Македонија или правото да го нарекуваат јазикот онака како што сакаат“, стои во соопштението на бугарската Влада.
Во соопштението, меѓу другото се додава дека Бугарија не прифаќа афирмацијата на идентитетот на македонските граѓани да биде на штета на нејзините национални интереси.
Од Софија уште еднаш порачаа дека во оваа фаза е невозможно да ја поддржат нацрт-преговарачката рамка.
