Предлогот на министерот за надворешни работи на Германија, Хајко Мас, Европа да создаде противтежа на САД, предизвикал бројни реакции, а експертите сметаат дека таа противтежа би можела многу да чини.
Во својот текст за германски “Ханделсблат”, насловен “Нема да дозволиме САД да делуваат зад нашиот грб”, Мас одговара на потезите на американскиот претседател Доналд Трамп да се повлече од Парискиот договор за климата и нуклеарниот договор со Иран од 2015. година.
Како што наведува “DW”, “така јасни зборови во насока на Вашингтон досега не се слушнале од Берлин”, а иако германската канцеларка Ангела Меркел рекла Мас изнел личен став, брановите кои ги предизвикал се големи.
Во својот текст, Мас ги изнесува темелите на концептот “Europe United”, односно силна и единствена Европска Унија која би била противтежа на САД, наведува DW, додавајќи дека тој не предвидува само “безбедносна и одбранбена унија”, туку и тесна соработка со Јапонија, Канада, Јужна Кореја и други.
Јан Техау од германскиот Маршалов фонд смета дека предлогот на Мас е конечно да се изведе големиот европски концепт и Европа да стане важен играч.
Како би можело тоа да изгледа германскиот министер објаснил со примерот со нуклеарниот договор со Иран, кој Трамп еднострано го прекршил и вовел остри санкции за Техеран, пренесува “DW”.
Европа, пишува Мас, мора да направи противтежа на тој американски потег, колку и да паѓа тешко.
Мас нагласува дека САД и Европа со години се отуѓуваат и дека доаѓа до намалување на поклопувањето на вредностите и интересите кои две децении се одредувале меѓусебно.
Опозицијата се сомнева дека Мас ќе може да оствари нешто од стратегијата која ја изнел во својот текст.
Политичарката на германската Левица, Хелин Еврим Зомер, во разговор за “DW” го поздравила барањето за посилна политичка независност од САД, но смета дека Меркел ќе го “забави” Мас.
