Стеф Кари повторно беше незапирлив. Синоќа, супер ѕвездата на Голден Стејт Вориорс го предводеше својот тим до победа од 111-105, на домашен терен против тимот на Орландо Меџик. Фантастичниот шутер овој пат реализираше 40 поени на кои додаде и 8 скока и 5 асистенции. Погоди 10 тројки од 19 обиди. 
Гостинските кошаркари се обидоа да го запрат на секаков начин, но Кари погодуваше со голема леснотија од сите позиции. На спротивната страна, црногорскиот репрезентативец Никола Вучевич, беше првото име кај составот од Флорида со дабл-дабл ефект од 25 поени и 13 скока.
Најдобриот шутер во лигата кој во моментов е втор најпрецизен “тројкаш” во историјата на NBA, имаше уште една сјајна вечер. За крајниот епилог одлучи серијата од 16-0 на “воините” во последната четвртина по која домаќините од -5, дојдоа на +11поени. Покрај капитенот Кари, се истакнаа уште и канадскиот интернационалец Ендрју Вигинс со 21 поен и крилото Кели Убре Јуниор со 17 поени и 10 скокови.
NBA FAN
Димитар Младеновски
