Египетски и американски археолози открија остатоци од најстарата пиварница досега на едно од најпознатите археолошки места, изјави Мостафа Вазири, генерален секретар на Врховниот археолошки совет на Египет.
Локалитетот со остатоци од античка пиварница е пронајден во Абидос, во близина на антички гробишта лоцирани во пустината западно од Нил, 450 километри од Каиро, пренесува АП.
Археолозите веруваат дека оваа пиварница датира од првиот династички период, кој траел од 3150 до 2613 година п.н.е., од времето на владеењето на кралот Нармер.
Д-р Метју Адамс од Универзитетот во Њујорк и еден од водачите на египетско-американската мисија што го открила археолошкиот локалитет рече дека тој и неговите колеги веруваат дека пивото се користело за време на ритуалите на кралските погребувања на најраните кралеви во Египет.
Претходните истражувања во истата област сугерираат дека пивото се користело за време на обреди на жртвување.
Пиварницата, чиј производствен капацитет изнесувал 22.400 литри, била поделена на осум делови со по 40 глинени садови за загревање на мешавина од житни култури и вода.
За постоењето на оваа пиварница зборувале Британците уште во 1900 година, но тие не можеле точно да утврдат каде се наоѓа.
