Поранешниот шеф на тајната полиција Сашо Мијалков не бил во неговиот дом на Водно кога полицијата вчера попладне пристигнала за да му врачи решение за куќен притвор, но во домот бил неговиот телефонски апарат, чиј сигнал бил следен, дознава Фокус од добро упатени извори вклучени во истрагата.
Според сознанијата до кои дошол овој портал, во текот на вчерашниот ден Јавното обвинителство доставило писмено известување до Министерството за внатрешни работи дека Мијалков планира бегство поради високата затворска казна што ја очекувал во предметот за масовното прислушување „Таргет-Тврдина“, по што биле преземени техничко-оперативни мерки.
Изворите на овој портал велат дека тој бил физички следен на јавен простор, како што било законски допуштено, но воедно бил следен и сигналот на неговиот телефонски апарат, кој со патиничко возило од хотелот Мериот стигнал до домот на Мијалков на Водно.
Врз основа на телефонскиот сигнал, се верувало дека Мијалков е дома, меѓутоа на крајот се испоставило дека возилото со кое патувал не било управувано од Мијалков, туку од од друго лице или лица, чиј идентитетот првично не можел да се утврди поради блиндираните прозори.
Непосредно пред да исчезне, Мијалков бил во друштво на поранешниот градоначалник на Аеродром Ивица Коневски, со кој пиел кафе со кафулето „Дистрикт“ во рамки на „Мериот“, меѓутоа Коневски утрово кусо изјави дека нема никакви информации поврзани со Мијалков.
