116 лица во земјава по вторпат се заразиле од Ковид 19, покажуваат податоците на Институтот за јавно здравје за реинфекција со коронавирусот.
Според професорот Никола Пановски, ваквата појава не е честа, бидејќи како што вели и во светски размери изнесува само 0,02 проценти. Тој предупредува дека сме безбедни додека не дојде бразилскиот сој на вирусот, бидејќи според последните студии, шансите повторно да заболите од корона се 20 до 60 проценти.
„Прашање е дали тие првиот пат биле болни, можеби биле само позитивни. Второ ако биле болни вториот пат е многу полесно, значи вториот пат може да се позитивни со лесна слика. Треба да се штитат затоа што законот е таков, немаат некаков сертификат дека прележале, некои имаат антитела, некои немаат, значи и вакцинираните како што сме и ние ќе ги почитуваме мерките. Главен проблем е ширењето на третиот бран, со тоа поголем број на смртни случаи, а најглавен е немање вакцина.“, вели Никола Пановски.
На прашањето дали во Македонија треба да се воведе повеќедневен карантин или викенд полициски час како во Србија, професорот Пановски смета дека од здравствен аспект, сите мерки се депласирани ако кафулињата и кафаните работат неконтролирано и без протоколи, додавајќи дека тука спаѓаат и преполните автобузи за јавен превоз.
„Ова што се прави во Србија би требало да се прави и кај нас кога ќе почне масовната вакцинација. Значи ние нема ништо да направиме ако сега 15 дена ги затвориме кафаните а после ги отвориме, само ќе се одложи и ќе спадне бројот.“, изјави Пановски.
Апел до грашаните за почитување на мерките упати и заменик министерот за здравство Илир Хасани.
„И додека болниците се преполни со пациенти поради компликации од Ковид19, па скоро и во приватните болници тешко се наоѓа слободен болнички кревет, сепак забавата не застанува во кафичи и кафеани.
Ова невнимание скапо ке не кошта.
Внимание, додека не е многу доцна!“, напиша Хасани.
Во земјава досега се регистрирани 112.930 случаи на ковид-19. Тоа значи дека 0,1% од заразените по вторпат биле инфицирани со вирусот. Од Министерството за здравство пред неколку дена изјавија дека е можно да има порестриктивни мерки за заштита, но таква одлука се уште нема. Дали ќе има ќе зависи од бројот на заболени и хоспитализациите во деновите до петок.
