Тобиас Цех, пратеник од Христијанско социјалната унија (ЦСУ) е уште еден од низата пратеници кој поднесе оставка во Бундестагот, пишува „Шпигел“. Тој го вратил мандатот поради тоа што неетички и незаконски, добил десетици илјади евра за да лобира за ВМРО-ДПМНЕ во 2016 година во обид да ја разубави сликата за Никола Груевски во Германија, тогаш силно погоден од аферата со прислушувањето.
Понатаму се наведува дека Цех, исто така, лично водел кампања за Груевски, кој подоцна беше осуден за корупција и побегна во Унгарија.
Оставката на Цех дојде откако локални весници во Баварија ги објавија овие податоци.
„Ова го правам за да го заштитам моето семејство и да избегнам штета на мојата партија преку можни предрасуди. Мислам дека легално нема конфликт. Но политички не можете да се однесувате така“, напиша Цех по оставката.
Тој во пораката пишува дека за неговите активности поврзани со ВМРО-ДПМНЕ секогаш бил известуван претседателот на Бундестагот и тие биле достапни и во парламентот.
„Сепак, од денешна гледна точка и во светло на тековната дебата јас би ги оценил поинаку своите договорени секундарни активности од 2016 година и сега не би ги извршувал“, вели Цех.
Блокот Меркел веќе изгуби тројца пратеници поради скандалите околу договорите за набавка на заштитни маски.
