Женската ракометна репрезентација со победа ги заврши настапите во квалификациите за Светското првенство (СП) и на турнирот на домашен терен ја совлада Грција (19-20) во меч во кој имаше многу технички грешки и промашувања кај нашиот состав.
По победите над Исланд и Литванија, местото во баражот за СП 2021 беше сигурно, па последниот меч се играше без притисок. Дуелот не изобилуваше со убава игра на македонската репрезентација како на претходните две средби, промашувањата беа во голем број, но на крајот, кога најмногу требаше, голманката Јована Мицевска изведе клучна одбрана и ѝ удри „блок“ на Грција, која турнирот го заврши со три порази на три меча.
Двете селекции се надигруваа на стартот на натпреварот и резултатот беше „тесен“, затоа што константно си го предаваа водството. Ниту една од селекциите не замина на два гола предност, а ударот го зададоа Гркинките кога на двапати на секој гол на Македонија враќаа со два и дојдоа до предност од 12-8. Проблем во играта на нашиот национален тим беше реализацијата, затоа што по првите 30 минути, по кои резултатот гласеше 13-10 за јужниот сосед, статистиката вели дека дури осум пати се погоди рамката на голот.
На стартот на вториот дел видовме една поагресивна Македонија во одбраната, а со мирни напади, избраничките на Симовски се вратија во мечот. Двапати Стојановска, а по еднаш Ѓорѓиевска и Џатевска, носеа голови и од 15-11 ја вратија Македонија на 15-15. Во следните минути и двете екипи грешеа. Заморот беше евидентен, но Македонија подобро се снајде во два напади во низа.
Двапати погоди Ристовска, за предност од 17-19 на пет минути пред крајот, а Грција ја прекина кризата преку Ментесиду (18-19), што беше знак за тајм-аут на Симовски. Неизвесноста траеше и во влезот на последната минута, затоа што на семафорот стоеше 19-20 за Македонија. а последниот напад го имаше Грција, која тргна да даде гол од крило, ама Јована Мицевска одлично го прочита ударот.
Најдобра кај Македонија беше Сара Ристовска со 10 гола, а Ѓорѓиевска, Боризовска и Стојановска имаа по два. Ливриниќ, Џатевска, Гичевска и Јовановска реализираа по еднаш. Кај Грција, Каципарасиду даде шест гола, а Гкациу и Зигора постигнаа по четири.
Ова ќе биде трето учество по ред во баражот за Мундијалите за Македонија. Претходно, нашите девојки за ривали ги добија Шведска и Словенија и доживеаја елиминации. Првите натпревари од баражот ќе се играат на 16/17 април, додека реваншите се на 20/21 април.
Последната одбрана на Мицевска:
Извор gol.mk
