Семејството на починатата Верица Белчовска, која беше удрена од автомобил кога се враќала од работа – ќе добие стан на користење, во Струмица, со одлука на Комисијата за станбени прашања во Владата.
Со оваа комисија претседава Министерот за транспорт и врски, Благој Бочварски, кој оваа вест ја соопшти преку својот профил на Фејсбук.
„Имајќи ја предвид бескрајната хуманост на семејството Белчовски, чија ќерка Верица трагично загина во сообраќајна несреќа, а нејзините органи беа донирани, како скромно оддолжување кон ова семејство, денеска на седница на Комисијата за станбени прашања при Владата со која претседавам, едногласно одлучивме да им биде доделен на користење стан во општина Струмица“, напиша Бочварски.
Покојната Верче е по потекло од Русиново, беровско, но во потрага по подобри услови за живот, семејството се преселило во Струмица. Во Берово останал нејзиниот најстар брат.
За потсетување, по нејзината смрт органите беа донирани на пациенти кои очекуваа трансплантација на срце и бубрези, а се искористија и делови од нејзините коски за трансплантација на коскена срж.
