Македонската влада вечерва донесе одлука пријателскиот натпревар Македонија – Словенија на први јуни да се игра со присуство на публика. Фудбалската федерација на Македонија побара една третина пополнетост на стадионот, а вечерва стигна „зелено светло“ за враќање на фановите на трибините.
„Како поддршка на македонската фудбалска репрезентација, која за првпат се пласира на Европското првенство и која на први јуни ќе одржи подготвителен пријателски натпревар, членовите на Владата донесоа одлука за исклучок од постоечката забрана за одржување на спортски натпревари, односно подготвителниот натпревар кој треба да се одржи на први јуни на Националната Арена „Тодор Проески“ во Скопје да се одигра во присуство на 30% исполнетост со публика од капацитетот на трибините. За дополнителни олеснувања за другите натпревари ќе се разговара на следната седница на владата“, објави вечерва владата на својата седница.
Дали сличен ќе биде протоколот и на натпреварот против Казахстан на четврти јуни, Владата дополнително ќе се произнесе.
