Познатиот холандски криминалистички новинар Питер Р. де Врис бил застрелан и тешко ранет на улица во Амстердам, јави националната телевизија NOS, додавајќи дека бил пренесен во болница.
Во полициското соопштение се вели дека неидентификуван маж бил застрелан во Амстердам.
„Еден човек беше застрелан во Ланге Лејдседварштрат. Повикана е итна служба, а полицијата трага по сторителот или сторителите“, се вели во полициското соопштение. Од сведоците беше побарано сами да се упатат во полиција за да дадат исказ.
Амстердамскиот весник Parool известува дека сведоците рекле дека Де Врис бил застрелан во главата. Весникот на својот онлајн портал објави видео од луѓе собрани околу лице кое лежи на земја.
64-годишниот Де Врис, славна личност во Холандија, честопати коментираше за телевизиски програми за криминал и е експерт за известување за криминал, со извори во полицијата и во подземјето.
Тој стана познат како истражувачки новинар по киднапирањето на магнатот за пиво Фреди Хајнекен во 1983 година, а во САД го истражуваше исчезнувањето на тинејџерката Натали Холовеј во 2006 година. Во неколку случаи на Де Врис му се закануваше криминалното подземје.
