Албанија објави дека протерала двајца Ирански дипломати поради наводни нелегални активности кои ја загрозувале безбедноста на земјата, пренесуваат тамошните медиуми.
Портпаролот на Министерството за надворешни работи изјави дека дипломатите биле протерани поради „кршење на нивниот дипломатски статус”, и дека одлуката е донесена по консултациите со други земји, вклучувајќи го и Израел.
Приватна телевизија „Топ канал“ објави дека Иранците се осомничени за нелегални активности во врска со квалификацискиот натпревар за Светското првенство во фудбалот помеѓу Албанија и Израел пред две години. По оваа игра, околу 20 лица беа уапсени во Албанија и Косово, а пред натпреварот беше спречен и напад.
Албанските власти не ги потврдија овие наводи.
Исто така, Албанија е дом на повеќе од 2 000 членови на иранската опозициска група Муџахедин ел-Халк, кои дојдоа таму од Ирак.
