Односите меѓу претседателот на Албанија, Илир Мета и американската амбасадорка во Тирана, Јури Ким, се влошија. Чашата се прелеа откако амбасадорката ги критикуваше неговите изјави за мобилизација на граѓаните за, како што рече Мета, заштитата на гласот на изборите утре. Ким изјави дека Мета за ваквите повици ќе одговара.
„Неприфатливо е некој да се заканува дека ако не им се допаѓаат резултатите од изборите, граѓаните треба да ги земат вилите на 25 април. Ваквите закани заслужуваат да бидат казнети. Оние што иницираат насилство ќе одговараат за своите зборови и постапки. Стоп“, изјави Јури Ким, Амбасадорка на САД во Тирана.
И реакцијата на Мета беше остра. Обвинувајќи ги САД за мешање во внатрешните работи на Албанија, Мета изјави: „Знам дека Американците можат да ме убијат.“
„Да, знаеме некои работи за вас, вели таа. Амбасадорката му вели на претседателот – знаеме некои работи за тебе. Што знаете за мене? Изнесете! Кажете им на луѓето! Јас не го кршам Уставот. Ако имаш нешто со мене, извести ме кога ќе имаш нешто. Знам дека можете и да ме убиете, но однесете ме во планина во дупка, испукајте ракета, за барем да не им наштетам на другите“, рече Илир Мета, претседател на Албанија.
Мета со ист тон ја нападна амбасадорката и во врска со Србија.
„Ѝ велам на амбасадорката, тоа што ѝ го реков првиот ден кога дојде во мојата канцеларија. Таа е одговорна за односите меѓу Албанија и Америка. Не е одговорна за односите меѓу Србија и Америка“, нагласи Илир Мета, Претседател на албанија.
Претседателот Мета ги повика Американците ако сакаат да си го земат Еди Рама со себе ако толку го сакаат, но оти тој не се плаши од американската дипломатска и воена моќ.
„Американците го сакаат Еди Рама? Нека го земаат, таму што сакаат нека прават. Но, тука во Албанија, луѓето одлучуваат. Ние затоа ја сакаме Америка, за слободни и фер избори, за ништо друго не ја сакаме. Дали се плашиме од Америка бидејќи има носачи на авиони и ракети? Имаат и Русија и Северна Кореја“, рече Илир Мета, Претседател на Албанија.
Оваа недипломатска комуникација на албанскиот претседател која ја искажа доцна синоќа на телевизиско гостување во Тирана, денеска предизвика бура и во дел од меѓународните медиуми, опишувајќи ја неговата остра реакција како војна против американската дипломатија во Албанија. Ваквите тензии меѓу Мета и амбасадорката Ким се засилија последниве денови кога претседателот, обвинувајќи ја амбасадорката, ја покани неа заедно со премиерот Рама на телевизиска дебата, за како што рече, да им ја каже вистината директно в очи. Ваквите ставови на Мета, Еди Рама ги нарече постапки кои не му личат на претседател.
