Езџан Алиоски се очекува кариерата да ја продолжи во Турција. За него заинтересиран е Галатасарај, кој се обидува да го обезбеди неговиот потпис.
Македонскиот интернационалец, кој нема да добие продолжение на договорот од Лидс Јунајтед, му порачал на агентот да бара нова опција. Убава понуда на маса пристигна од гигантот од Истанбул, кој има потреба од фудбалер кој може да игра на левата бековска позиција.
Моменталната откупна сума на која се проценува 29-годишникот изнесува четири милиони евра. Управата на екипата предводена од Фатих Терим е подготвена за соработка, а според турските медиуми договорот е на чекор од остварување.
Во наредниот период ќе бидат познати деталите од условите под кои ќе биде потпишан договорот. Алиоски по четири години во Англија ќе си замине и ќе започне нова етапа во својата кариера.
Играјќи за Шафхаузен, Лугано и Лидс, македонскиот репрезентативец одигра повеќе од 350 официјални натпревари, на кои запишал 50 гола и 43 асистенции.
