Минатата недела низа медиуми објавија дека приоритет на Лидс е до крајот на месецов да го заврши новиот договор со Алиоски, па ќе му понудат четиригодишна соработка со неделна плата од 30.000 фунти. Алиоски има 142 меча за Лидс, девет од нив сезонава во Премиерлигата, во последно време е стандарден лев бек…
„Сѐ уште ништо не се случило. Тука сум, секако до последен ден, кога ќе ми истече договорот со Лидс. И не ни размислувам дека јас би заминал од Лидс. Мојата глава е концентрирана само на Лидс. Но, што ќе се случи – ќе се случи на крајот“, вели Алиоски.
Македонскиот репрезентативец кој летоска ќе игра на Европското првенство после историскиот успех за пласман на еврошампионатот, посочува дека желба му е да остане во Лидс и понатаму. Тој во летото 2017 година дојде од швајцарски Лугано и на лето му истекува четиригодишниот договор.
„Секако дека сакам да останам во Лидс. Но, ова се работи за кои други луѓе треба да менаџираат. Јас едноставно сакам да уживам во секој момент додека сум тука. Тука сум, сакам да сум фокусиран само на фудбалот. Гледам дека по медиумите има сѐ за другите работи, ама ништо не се случило засега. Јас сум тука секој ден максимално сериозен, ама и секој ден во кој уживам во Лидс“, додава Алиоски.
