Франческа Есплин убила пума во Колорадо, а потоа објавила морничави фотографии и снимка од ловот кои ја згрозија јавноста.
Нејзината објава на Фејсбук покрена лавина од негативни коментари на социјалните мрежи кои го осудуваат нејзиниот чин. Како што напишала покрај фотографијата на која позира со крвави раце, убиството на пумата била нејзина најголема желба и додала дека поради тоа сега се наоѓа на “седмо небо”.
Една локална невладина организација ја споделила нејзината објава, а директорката Дијана Мејер изјавила дека убиствата на животни поради трофеј се косат со етичките принципи на ловот кој би требало да служи за преживување и исхрана.
“Немам ништо против етичкиот лов”, вели Мејер и додала дека живее од дивеч веќе 25 години, меѓутоа смета дека ловот не би требало да вклучува селфија со мртви животни и позирање со широка насмевка и крвави раце.
Фотографиите брзо се прошириле на социјалните мрежи, предизвикувајќи бран од негативни реакции и коментари, а луѓето ја нарекуваат “психопат” и “чисто зло”. Франческа реагирала со објава во која вели дека ловот е дел од нејзиното наследство, додавајќи дека е лута на здружението кое без нејзина согласност ги објавило фотографиите. Додала и дека таа и нејзиното семејство сега добиваат смртни закани.
