Болести, јаз меѓу богатите и сиромашните, климатски промени и судири во и меѓу земји ќе претставува поголем предизвик во наредните децении, а пандемијата на Ковид-19 веќе довела до влошување на некои од тие проблеми, се наведува во американскиот разузнавачки извештај кој е објавен во четвртокот, пренесува “Reuters”.
Соперништвото меѓу Кина и коалицијата на западни земји, предводени од САД, веројатно ќе се интензивира и ќе биде поттикнато од смена на воената моќ, демографските прилики, технологии и “зацврстување на поделбите во поглед на моделите на управување”, се истакнува во извештајот “Глобални трендови 2040” кој го издал американскиот Национален разузнавачки совет (NIC).
Регионалните сили и недржавни актери би можеле да имаат поголемо влијание, а веројатните последици од тоа “се понестабилна геополитичка средина повеќе склона на конфликт” и ослабување на меѓународната соработка, се оценува во извештајот.
Извештајот на водечките американски разузнавачки аналитичари, кој се објавува на секои чеири години, проценува политички, економски, социјални и други трендови кои веројатно ќе ја обликуваат националната безбедност во наредните 20 години.
“Нашата намера е да им помогнеме на оние кои ја утврдуваат политиката и да ги подготвиме граѓаните за низа можности во иднината”, напишале авторите, наведувајќи дека не изнесуваат специфични предвидувања и дека во извештајот опфатиле мислења на различни групи – од американски студенти до африкански активисти за граѓански права.
Предизвиците како што се климатски промени, болести, финансиски кризи и технолошки пореметувања “веројатно ќе се појавуваат се почесто и поинтензивно во речиси сите региони и земји”, што ќе доведе до “распространето преоптоварување на државите и општествата, како и до шокови кои би можеле да бидат катастрофални”, се предупредува во извештајот.
Се додава дека пандемијата на коронавирусот, која однела повеќе од 3 милиони животи, ќе преставува најголемо глобално пореметување од Втората светска војна, со последици кои ќе траат со години.
Ковид-19, како што се наведува, ги покажал но и продлабочил разликите во здравствената заштита, довел до раст на националните долгови, го забрзал национализмот и политичките поделби, ја продлабочил нееднаквоста, поттикнал недоверба во владите и го нагласил неуспехот на меѓународната соработка.
“Постојат одредени трендови, кои ние ги утврдивме, кои забрзуваат или се засилуваат поради пандемијата”, рекол неименуван службеник на “NIC”, пренесува “Reuters”.
Во извештајот се изнесуваат пет сценарија за тоа како светот би можел да изгледа до 2040-та година.
Во најоптимистичното – ренесансна демократија – демократските влади би се покажале како поспособни да поттикнат научни истражувања и технолошки иновации, забрзувајќи го економскиот раст, што би им овозможило да се соочат со домашните проблеми и да се спротивстават на меѓународните ривали.
Во најпесимистичното сценарио – трагедија и мобилизација – се изнесува претпоставката дека Ковид-19 и глобалното затоплување би можеле да ги опустошат глобалните резерви на храна, што би довело до немири во кои би загинале илјадници луѓе.
