И пред да влезам во Владата, моето семејство и пријателите знаеја каква е мојата сексуална ориентација, како што, се разбира, ја познаваа мојата партнерка. Бев свесна дека тоа ќе биде дел од мојата биографија, ако може да кажам така, кој ќе биде интересен за јавноста во Србија, вели премиерката на Србија Ана Брнабиќ.
Во интервју за белградскиот магазин “Понос”, премиерката зборува за сексуалната ориентација, но и за дискриминацијата со која, како што вели, секојдневно се соочува. Поддршка од најблиските има, но се надева и дека приказните за поделбата на “геј” и “стрејт” ќе престанат да бидат табу.
Вели дека не и пречело тоа што откако ја прифатила работата во Владата на Србија, прво како министерка, а потоа и како премиерка, нејзината сексуална определба ќе биде нешто за што луѓето ќе се “фаќаат”.
-Не ми пречеше оти сметав дека и така Србија се менува и дека ќе научи да ја прифаќа различноста. Се надевав дека тоа ќе им помогне на некои други луѓе да се чувствуваат поудобно во своја кожа, да соберат сии да си го живеат животот. Додуша, предизвик беше што за тоа на почетокот се зборуваше многу повеќе отколку за мојата професионална биографија и компетенции кои се сепак единственото релевантно нешто за работата за која тогашниот премиер ме покани да ја вршам, вели таа.
Брнабиќ додава дека ја изненадиле реакциите и дека тоа што е таа било бргу прифатено.
-Позитивно ме изненади што повеќето граѓани, дури и оние повозрасните и потрадиоционалните, тоа бргу го прифатија и го тргнаа на страна. Секогаш кога патувам низ Србија луѓето љубезно ме дочекуваат, без дофрлувања или навреди, вели таа.
Но додава дека навреди и прозивања имало токму онаму каде што не ги очекувала, кај како што вели “таканаречената демократска и европска елита”.
-Не очекував и навистина ме шокираше што од таканаречената “демократска” е “европска” елита добивав и денес добивам најголеми навреди и непримерни коментари, меѓу кои секако се истакнуваат “хомопремиерка” или прашања од типот “имаат ли геј премиерките некој посебен третман в затвор или е онака исто како со сите”. И двата коментара дојдоа од луѓе кои во минатото се претставуваа како исклучително либерални, но целата вистина очигледно е многу поинаква, раскажува таа.
Брнабиќ вели дека иако е на функцијата премиерка, била дискриминирана токму поради својата сексуална ориентација. Вели дека дел од пратениците кои го сочинуваат владејачкото мнозинство не гласале за програмата на владата која ја претставувала во Собранието како ни за нејзиниот тим и тоа поради нејзината сексуална определба.
-Исклучително сум благодарна и имам голема почит кон СНС и сите нивни пратеници кои несомнено, и покрај некои нивни лични несфаќања и вредности, го тргнаа тоа на страна и ми дадоа шанса. Имавме и во самиот мој тим во Владата некои судири на мислења. Јас го почитувам тоа, такви работи и треба да се дискутираат за да се менува општеството, но кога станува збор за тим тие не треба да се дебатираат во јавност, вели таа.
Премиерката на Србија вели дека дискриминација трпи и од политичките неистомисленици. Вели дека тешко дека нема име кое не го употребиле за неа, од хомопремиерка, до тоа дали да и се обраќаат со господин или госпоѓица, па ја нарекуваат брате или дечко, Пантела, султанија…
-Но добро. Се надевам дека ќе се “издуваат” на мене, дека полека ќе се навикнат дека нема разлика кај една личност, во нејзините човечки квалитети или нивниот недостиг, дека сите во таа смисла сме исти, без оглед дали е некој “стрејт” или ЛГБТ, дека во тек на време тоа ќе престане да биде табу и интересно, дека со пречестата употреба луќето ќе престанат да реагираат, вели таа.
Додава дека отсекогаш ја имала поддршката од најблиските, но и дека многумина не се во таква ситуација.
-Немам никакви дилеми дека мојата сексуална ориентација не треба да биде скриена, особено што сум јавна личност. Неизмерно сум и благодарна на мојата партнерка што се согласи да ме следи во тоа, иако никогаш не сакаше да биде јавна личност, вели Брнабиќ.
Кога станува збор за советите, таа објаснува дека тоа што некој е геј или стрејт не е прашање на избор туку “едноставно тоа што сте”. –Како што дали сте родени бели или црни не е прашање на избор, нагласува таа.
Парадата на гордоста која секоја година се одржува во Белград за неа е ден кога покажуваме дека сме ја надминале омразата и кога покажуваме дека секој има право да шета по својот град, по својата земја и дека има право да живее како што сака без тоа да ги загрозува другите.
-Со влегувањето во политиката лицемерно е како прва геј министерка и сега премиерка да не му дадам поддршка на Прајдот и да не испратам политичка порака дека прошетката не треба да биде уште една од работите за поделба во нашето општество. За мене тоа е начин да дадам активен придонес да се избориме против стереотипите и предрасудите. Тоа е порака дека заедно градиме општество кое е отворено, кое ги почитува различностите, кое почитува различни ставови и го негува дијалогот. Тоа се вредностите во кои јас верувам, заклучува Брнабиќ во интервјуто за “Понос”.
