Црвено-жолтите пред два дена напишаа историја, обезбедија настап на Европското првенство догодина, па сега без оглед на истрошеноста после исцрпувачкиот меч во Тбилиси, селекторот Игор Ангеловски посочи дека должност на оваа селекција е да победи и на овие последни два меча годинава за да ја оствари и втората цел.
„Јас реков дека прва цел е пласман на ЕП, ама моментално сме први во групата и ќе се обидеме така да ја завршиме и оваа Лига на нации. Нормално е дека после еден голем успех и еден голем пласман, емоциите да се празни, ама кога се игра за Македонија сите мора да се потрудат да одиграат максимално. Имаме доволно квалитет, а и свежина за да победиме, па да одиме на Кипар и таму да решаваме за тоа прво место“, вели Ангеловски.
Тој посочува дека Македонија стекна реноме и углед со пласманот на ЕП, па сега тој товар од утре па натаму ќе мора да го брани.
„Мора сето ова да нè мотивира да ја освоиме групата. Ние од утре играме како селекција која ќе игра на ЕП и тоа е еден товар што мора да го браниме. Јас побарав од фудбалерите максимално сериозно да влеземе и да го добиеме овој меч, за што секојпат сме биле сериозни. Ќе ја извадам најдобрата тактича опција од тоа што го имаме на располагање, долго време веќе сме заедно, добро се знаеме и знаеме што треба да направиме на терен“, додава селекторот.
Македонија против Естонија ќе биде без Горан Пандев, Столе Димитриевски, Аријан Адеми, од претходно повредениот Енис Барди, а нема да игра ни Езџјан Алиоски поради суспензија за жолти картони. Од вчера дополнително повикан е Љупчо Дориев, откако поради ковид-19 во младата селекција, не успеа повикот на тројца надежи Дарко Чурлинов, Ристе Јанков и Тодор Тодоровски.
