Бајага најавува одлична концертна забава на 13 септември!
Момчило Бајагиќ – Бајага е повторно во Македонија. Концертот кој беше оваа пролет откажан поради коронавирусот, сега на 13 септември ќе се одржи во Скопје на стадионот на АРМ. И не е тоа против малери, како што вели една негова македонска песна, а можеби е, никој не знае. 13 како датум овој пат, сепак, нека биде среќен број. Публиката е нестрплива да се сретне со својот музички миленик кој ќе има што да и понуди. Тоа го најавуваат и организаторите од “Авалон продукција“.
Со овој концерт Бајага и неговата група “Инструктори“ одбележуваат 35 години успешна музичка кариера. Затоа тоа ќе биде посебно доживување за сите што ќе присуствуваат, бидејќи за првпат 22 песни ќе бидат изведени придружувани од хор и оркестар, под диригентската палка на маестро Војкан Борисављевиќ, многу познат ексјугословенски композитор и некогашен уметнички директор на фестивалот “Белградска пролет“.
– Ова ќе биде прв мој концерт заедно со групата, од почетокот на пандемијата, вели Бајага. И не е ништо едноставно во ова време, бидејќи за да дојдам сега во Скопје пред концерт морав да направам ПЦР-тест. За среќа, како што гледате, сè е во ред. И што се однесува до мене јас сум одлично расположен, концертот може да почне.
–
Но, нашиот план беше овој концерт да го одржиме многу порано, и тоа во затворен простор, но со оглед на околностите со концертот под ведро небо избравме најбезбедна варијанта за сегашните услови. Инаку, за самиот целовечерен настап направивме избор од 22 наши најголеми хитови што ќе ги пееме пред скопската публика. Всушност, песните ги избиравме и според тоа како ќе звучат со самиот оркестар.
Меѓу другите ќе ги исполниме: „Зажмури“, „Руски воз“, „Откад тебе волим“…, а ќе ја слушнете и „Сви мои другови“, која во нов аранжман звучи многу поинаку од онаа оригиналната. Интересно е што на концертот ќе се измешаат енергиите, нашата и онаа на овдешните хористи и музичари, а тоа ветува едно навистина посебно доживување, објасни популарниот Момчило Бајагиќ – Бајага. Маестро Војкан Борисављевиќ, кој е автор на повеќето аранжмани, ќе направи и две проби, со оркестарот, а потоа и со групата “Инструктори“.
– Планираме да издадеме ди-ви-ди од серијата концерти со оркестрите во регионот, по повод нашиот 35-годишен јубилеј. Искрено да кажам јас сум фасциниран од звукот на песните и одвај чекам да видам како сега тие песни ќе и се допаднат на македонската публика, која е исклучително музикална публика, објаснува Бајага.
–
Организаторот најави дека во продажба се пуштени само 4.000 билети за стадионот на АРМ, кој има капацитет од 15.000 посетители, со оглед на корона ситуацијата. Концертот ќе трае околу три часа, а носењето на заштитни маски ќе биде задолжително за сите, дезинфекција на рацете, како и задолжително држење на растојание, сè во согласност со пропишаните протоколи за одржување на јавни настани, па така и на концерти.
