Американскиот претседател Џо Бајден, кој најави дека САД ќе донираат половина милијарда вакцини против Ковид-19 во 92 земји кои се во огромна потреба, на својот Твитер профил напиша дека е исправно и паметно и дека овие вакцини ќе спасат милиони животи.
Бајден вчера потврди дека САД ќе купат половина милијарда вакцини против Ковид-19 со цел да ги донираат во земји со пониски примања без никакви услови.
„ Ќе започнеме со испорака на 500 милиони вакцини во август, веднаш штом ќе заврши нивното производство“, објави Бајден на прес-конференција пред почетокот на самитот на Г7 во Велика Британија.
Today, I’m announcing that the United States will donate half a billion new Pfizer vaccines to 92 low- and lower middle-income countries.
These Pfizer vaccines will save millions of lives around the world, and be produced through the power of American manufacturing.
— President Biden (@POTUS) June 10, 2021
Висок функционер на американската администрација денес потврди дека САД ќе донираат 500 милиони вакцини на „Фајзер“ за 100 земји со најмал приход во светот и дека нема да бараат никакви контра-услуги за возврат.
САД ќе плаќаат на „Фајзер“ околу 3,5 милијарди долари за вакцини, а договорот ќе биде финализиран во следните недели, изјави официјалното лице за „Ројтерс“.
„Фајзер“ и германскиот партнер „Бионтек“ вчера објавија дека се согласиле на американската влада да ѝ испорачаат 500 милиони дози вакцини.
Според најавата, испораката на 200 милиони дози ќе започне во август и ќе заврши до крајот на годината, додека 300-те милиони дози планирани за 2022 година ќе бидат испорачани во периодот од јануари до крајот на јуни.
