Бугарските власти соопштија дека ги истражуваат мотивите на престојот во Бугарија во ноември 2018-та година на десничарскиот екстремист кој изведе вооружен напад на две џамии во Нов Зеланд.
28-годишниот Австралиец кој изведе напад на две џамии во местото Крајстчрч во Нов Зеланд, престојувал во Бугарија од 9-ти до 15-ти ноември 2018-та година, потврдија бугарските власти. Бугарскиот министер за внатрешни работи, Младен Маринов истакна дека е отворена истрага која има за цел да ги разоткрие мотивите на престојот на овој човек и дали имал контакт со други луѓе.
Како што пренесуваат бугарските медиуми, тој пристигнал во Софија од Дубаи на 9-ти ноември, а од 10-ти ноември изнајмил автомобил и посетил неколку историски локации. Потоа, тој заминал за Букурешт, од каде што продолжил кон Унгарија.
Тоа не е прв пат Австралиецот да престојува на Балканот – тој од 28-ми до 30-ти декември 2016-та година со автобус поминал низ соседна Србија, потоа Хрватска, Црна Гора и Босна и Херцеговина.
Главмиот осомничен за нападот во Крајстчрч каде што беа убиени 49 муслимани објави манифест според кој, како мотив за неговиот напад наведе дека се бори против имиграцијата која ја преплавува европската култура.
