Се проценува дека во конфлиткот во Украина кој што изби во 2014-та година помеѓу украинската армија и сепаратистичките, про-руски терористи се убиени повеќе од 10 илјади луѓе.
Неколкумина државјани на Србија кои што се бореа на страната на про-руските сепаратисти во неколку единици, вклучувајќи ја и озлогласената група на платеници „Вагнер“, се осудени пред српските судови, но во најголемиот дел станува збор за условни казни.
Судските документи сега откриваат како тие стигнале во Украина и каде се бореле, открива Балканската истражувачка мрежа (БИРН).
„Барутот останува под кожата. Има адреналин, неизвесност. Како да имате секс во дивината“, изјави Стеван Милошевиќ кој што се бори на страната на про-руските сепаратисти во Донбас во источна Украина.
Тој открива дека неговиот ден на истокот на Украина започнувал во шест часот наутро со кафе и доручек, по што заминувал на својата позиција каде што стоел и со денови – чекајќи и убивајќи украински војници.
Според истражувањето на БИРН, најголемиот дел од српските државјани (осудени се 29 Срби), се приклучиле на Меѓународната бригада „Пиатнашка“ која што спред информациите на руската социјална мрежа „Вконтакти“ се бори во регионот Доњецк на истокот на Украина.
Милошевиќ кој служел во војска во периодот од 2006-та до 2012-та година, за прв пат престојувал во Донбас од 2014-та до 2015-та година каде што пристигнал за да се бори и да им помогне на своите „браќа Руси“.
Судските документи откриваат дека најголемиот дел од Србите се бореле за единицата „Прирак“. Тие биле вооружени со автоматски пушки и главна задача им била да обезбедуваат згради во Донбас. Сепак, имало и Срби кои што ги возеле „Т-64“ тенковите и борбените возила на про-руските сепаратисти.
Еден од најпознатите српски војници на украинскиот фронт е Дејан Бериќ, кој што на српската јавност ѝ е познат по неговите објави на социјалната мрежа Фејсбук. Тој никогаш не се нашол пред српските судови, иако е повеќе од јасно дека е задолжен за регрутирање на српски борци и нивно испраќање во Украина.
На неговиот профил на Фејсбук пред 5 месеци дури биле објавени и фотографии од пораки за договорите за регрутирањето на војници. На фотографијата подолу може да се забележи дека почетната плата која што српските платеници ја добиваат за да се борат за Русите во Украина изнесува 1,700 евра, а јасно е дека толку високи парични средства пристигнуваат директно од руската власт.
Руската паравоена компанија „Вагнер“ има одиграно голема улога во крвопролевањата во источна Украина, а од 2016-та година оваа паравојска е активна и во Сирија. Се верува дека паравојската е поврзана директно со властите од Москва, иако руските власти негираат била каква поврзаност.
Игор Гусков од украинската разунзавачка служба откри дека најмалку седум српски платеници се бореле во источна Украина како дел од „Вагнер“, од кои еден бил убиен.
Како што пренесува БИРН, српските борци кои што се борат на страната на руските терористи во Украина против легитимната украинска армија сериозно наштетиле на односите помеѓу Србија и Украина. Украинскиот амбасадор во Србија, Олександар Александровиќ изјави дека се претпоставува дека во 2017-та година околу 300 српски борци се бореле во Украина и ги обвини српските власти за игнорирање на проблемот поради блиските односи со Русија.
Српскиот премиер Александар Вучиќ во 2014-та година ги повика Србите кои се борат во Украина да се вратат дома затоа што нивната борба за пари ѝ наштетува на Србија. Сепак, голем број на Срби се приклучија во борбите на страна на про-руските сепаратисти поради тоа што имаат симпатии кон Русија, но и поради високата плата која што ја добиваат за да вршат терор на украинска територија.
