Денеска во Кривичниот суд продолжи судењето за случајот „Меѓународен сојуз“, а за истиот сведочеше менаџерот на компанијата „Дрим билдинг“, Ресул Лога, кој му исплатил 350 илјади евра во кеш на Бојан Јовановски како услов да бидат дел од проектот за изградба на старечки дом.Лога вели дека соработката со „Меѓународен сојуз” била преку неговиот партнер Адријан Амзовски.
„Проектот беше за меѓународни домови за стари лица. Од разговорите ни беше кажано дека треба ние да платиме за да го добиеме тој проект. Требаше 350 илјади евра во кеш и 16 милиони и 100 илјади денари на фактура на проект по авторски права на Јасна Мандиќ“, вели сведокот.
Во проектот, Лога се приклучил затоа што го разгледал и му изгледал како профитабилен, а тоа што ги гледал поранешните пратеници на СДСМ, Фросина Ременски и Александар Кирацовски, им влевало доверба дека проектот ќе успее, пренесува „Фактор“.
„Довербата ја стекнавме дека имаше и луѓе од владата, како Фросина Ременски, на состаноците повремено присуствуваше и Александар Кирацовски и кога тие ги гледате имате доверба дека проектот ќе се реализира“, вели тој.
Сведокот посочи дека по потпишувањето на договорот исплатиле 15 милиони денари и останaле уште милион и нешто, но по истекот на рокот од 180 дена од договорот тие побарале да им ги вратат средствата.
„Во тој рок требаше да ја обезбедат локацијата и дозволата за градба. Тоа не се испочитува од „Меѓународен сојуз”. Господин Бојан врати 155 илајди евра“, рече Лога.
На денешното рочиште, следен треба да сведочи бизнисменот Адријан Амзовски.
За случајот со невладината организација „Меѓународен сојуз”, основана од Бојан Јовановски-Боки 13, преку која според обвинението биле измамени бизнисмени за наводни центри за возрасни лица, обвинети се и Фросина Ременски, Миле Јовановски, таткото на Боки 13 и Јасна Мандиќ Ерцеговиќ.
Јовановски е обвинет за измама и перење пари. Ременски е обвинета за помагање во делото измама, Мандиќ за помагање во измамата и перењето пари, Миле Јовановски се терети за помагање во перењето пари и за неовластено изработување, држење, посредување и тргување со оружје. Како правно лице обвинета е и невладината организација, пренесува „Канал 5“.
