Шампионот Џорџ Камбосос Јуниор, не е тип кој избегнува предизвик! Предизвикот овој пат, го чинеше премногу.
Американецот Девин Хејни го задржа својот непоразен примат победувајќи го Камбосос, при што успеа да стане неприкосновен шампион во лесна категорија. Хејни има 29 победи без пораз. Камбосос има 21 победа а синоќа го претрпе првиот пораз во кариерата.
Хејни извојува едногласна одлука за победа (116-112, 116-112, 118-110) за да стане првиот борец во лесна категорија што ги освоил ВБА, ИБФ, ВБО и ВБЦ појасите и најмладиот во историјата. Камбосос има клаузула за реванш, а продолжението ќе се одржи уште еднаш во Австралија.
Очигледно постои голем интерес од австралиската јавност, со 41.129 присутни на стадионот Марвел – втора по големина посетеност на борба во австралиската модерна боксерска историја. За очекување следниот дуел помеѓу овие динамични боксери повторно да се случи на исто место.
“Ова е остварување на сонот.“, рече Хеjни по борбата.
“Борбата се одвиваше според планот. Го оставив хендикепиран. Не успеа да го покаже најдоброто од себе. Се што сакаше да направи не му дозволив. Му симнувам капа, тој е вистински воин. И покрај тоа што пред борбата имавме вербален судир, јас останав џентлмен и професионалец.”
Димитар Младеновски
