Три и пол години откако Никола Груевски побегна во Будимпешта за да го избегне издржувањето казна затвор за случајот со „мерцедесот“, неговата сопруга Боркица поднела барање за развод.
Тоа може да се види од судските огласи во Граѓанскиот суд во Скопје. Во еден таков оглас стои дека „Боркица Груевска од Скопје, ул. ‘Павел Шатев’ бр. 3-1/15“ поднела тужба против „тужениот Никола Груевски од Скопје со непознаата адреса за развод на брак“.
Огласот е издаден на 4 јули 2022. Во него се наведува и дека Меѓуопштинскиот центар за социјална работа на град Скопје ја поставил адвокатката Габриела Јакшевски за застапник на Груевски „сѐ до правосилното завршување на постапката или сѐ додека тужениот не се јави во постапката“. Веројатно се води и постапка за старателство на нивните две ќерки.
Боркица е втора сопруга на Никола Груевски. Тие стапија во брак во 2007 година.
