Српската јавност е вознемирена од обвинението на актерката Данијела Штајнфелд дека ја силувал познатиот актер и колега, Бранислав Лечиќ.
Лечиќ претходно се огласи и истакна дека обвиненијата се невистинити, но сега објави и видео во кое откри дека добил покана од Вишото јавно обвинителство во Белград, во петок да сведочи во врска со овие обвинувања, како и дека тој бил повикан како ‘граѓанин, а не обвинет’.
„Го снимам ова видео со желба да ѝ се обратам на српската јавност поради сè што се случува изминативе денови“, рекол Лечиќ на самиот почеток.
„Добив покана од Обвинителството и ќе одам таму во петок. Почувствував дека во медиумите веќе сум осуден. Дека сите мислат или почнуваат да мислат дека сум силувач, монструм, насилник, предатор, подлец, лицемер, кој е способен на такво дело наречено силување жена. Можеби утре тоа ќе биде и некој маж, можеби утре ќе слушнам дека сум силувал и деца. Секој човек на кој ќе му се случи ваква работа, мора сериозно да се запраша за себе и за друштвото околу себе. Оваа изјава многу ме повреди, како и луѓето кои се околу мене и кои ги сакам“, вели Лечиќ и истакнува дека ‘во овој случај некој од нив ја зборува вистината, а некој лаже’.
Актерот потоа директно ѝ се обраќа на Данијела Штајнфелд:
„Данијела, ако некогаш во било кој момент, со било кој потег или некои мисли или можеби со случаен или неслучаен гест сум те навредил, повредил, понижил… И ако било која жена на таков начин сум ја навредил за да стекне впечаток дека сум агресивец или предатор, тогаш длабоко и искрено се извинувам. Јас во мојот живот немам потреба да се правдам, но мене жените ми се инспирација во животот. Тие се и мој предизвик и моја фантазија и моја инспирација. И секогаш низ животот сакав жени, ги штитев жените и никогаш не сум бил агресивен кон нив. Кажи ја вистината Данијела – само бевме партнери на работа. Но, како што во претставата немаше реализација на нашиот сексуален однос, бидејќи твојот лик беше заљубен во мојот, тоа не се случи ниту во животот“.
Лечиќ тврди дека со актерката никогаш немал ниту ‘љубовен однос, ниту сексуален, а особено не тоа да било силување’.
Тој ја повикал актерката да ја објави аудио снимката од разговорот во целост. Тоа е еден од доказите кој е доставен во Обинителството, кој актерката го снимила со Лечиќ неколку години после силувањето.
