Џанлуиџи Буфон по вторпат стави крај на својата авантура во Јувентус и се врати во редовите на Парма каде сега настапува во Серија Б, но како легенда на најтрофејниот клуб во Италија, потенцира дека се уште ги следи сите случувања во Торино.
Јувентус се наоѓа во период на транзиција по кам-бекот на Масимилијано Алегри, но и своевиден период на адаптација откако претрпе голема загуба во последните денови од летниот преоден рок.
Кристијано Роналдо реши да си замине и направи трансфер во Манчестер Јунајтед, а иако Буфон има само позитивно мислење за Португалецот, смета дека Јувентус со него ја загубил својата најголема вредност.
– Јувентус имаше добра шанса да ја освои титулата во Лигата на шампионите во првата сезона во која играше Роналдо, но не знам што им се случи. Кога се вратив, работев со Роналдо две години и заедно ни беше многу добро.
– Сепак, сметам дека Јувентус загуби една многу важна работа со Роналдо, заборави да биде тим. Јувентус ја загуби својата ДНК да биде и да игра како тим. Во 2017-та година стигнавме до финалето во Лигата на шампионите бидејќи бевме полни со искуство, но бевме дна целина. Бевме многу силна група, а го загубивме тоа со доаѓањето на Роналдо, – вели Буфон во интервјуто за „ТУДН“.
