„Цел живот го поддржував мојот брат, но не можам повеќе“, изјавил принцот Вилијам во првата изјава откако неговиот брат, принцот Хари со сопругата Меган одлучија да се откажат од сите кралски должности и ја шокираа Велика Британија.
Принцот Вилијам изјавил дека е тажен поради одлуката на Хари да се оддели од кралското семејство, пренесува „Сандеј Тајмс“.
„Цел живот го поддржував мојот брат, но не можам повеќе. Ние сме сега два одвоени светови, тажен сум поради тоа. Се што можеме да направиме, се што можам јас да направам е да се надевам дека ќе дојде денот кога повторно ќе мислиме исто. Сакам сите да бидеме во еден тим“, му рекол принцот Вилијам на близок пријател, пренесува британскиот медиум.
Кралицата Елизабета го повикала својот внук, принцот Хари утре на „кризен состанок“ на кој би се разговарало за неговата и иднината на неговата сопруга Меган, откако парот соопшти дека се повлекува од кралските должности.
Неговиот татко Чарлс, како и братот Вилијам исто така ќе присуствуваат на состанокот кој ќе биде одржан утре на кралскиот имот Сандрингам во Норфолк на истокот на Англија, соопштил извор од Бакингемската палата.
Хари и Меган, познати како војводата и војвотката од Сасекс, во средата ја шокираа британската јавност откако соопштија дека се повлекуваат од кралските должности, дека сакаат да бидат финансиски независни и повеќе време да поминуваат во Северна Америка.
