Червар е еден од најеминентните тренери во светскиот ракомет, а зад неговиот успех стојат медали и пехари. Сепак, за да бидете толку успешен тренер, мора во кариерата да сте воделе и расни играчи. Червар им бил претпоставен на Ивано Балиќ, Перо Метличиќ, сега на Домагој Дувњак, но и покрај сите вели дека најдобриот кој некогаш го тренирал е Кирил Лазаров.
„Обично не издвојувам поединци, ама Кирил Лазаров е исклучок. Тој е најдобриот ракометар кого некогаш сум го тренирал во мојата кариера. Додека на другите спортисти со текот на годините им спласнува мотивацијата, нему му расте. Тој секогаш сака повеќе, подобро и има неверојатен победнички менталитет. Многу е талентиран, но неговиот успех е комбинација од самоодрекување, тренинзи, креативност, трпение и победнички карактер. Јас бев неговиот прв странски тренер и го знам од почетокот. Тој е пример за младите играчи како да ја продолжат својата кариера“, истакна некогашниот селектор на Македонија.
Тој ја предводеше нашата репрезентација на претходното СП, во Франција, а претходно осум години беше тренер на Металург и затоа одлично ја познава Македонија. Играше и против Раул, дури еднаш го има и победено како аутсјдер, така што ги има сите алати за да победи денеска од 18 часот. Сепак, за тоа ќе треба да функционира неговата талентирана репрезентација. Хрватска досега ги победи Исланд и Јапонија, меѓутоа Червар е загрижен за нивната игра.
„Имавме 18 технички грешки против Јапонија. Тоа многу ме загрижува, мора да ги редуцираме, ако сакаме добар резултат против Македонија. Сѐ над 10 загубени топки е лошо“, предупредува Червар.
