Дивите таксисти ако начекаат такви кои не го познаваат градот, тогаш се сигурни дека ќе заработат. А уште ако начекаат странци и ги возат од аеродром до центарот на градот, заработката загарантирано е повеќе од добра.
Вакви таксисти може да се забележат секоја вечер и на Железничката и на Автобуската станица. Тие најпрвин ги одбираат жртвите, а потоа им приоѓаат и тивко ги прашуваат дали сакаат такси-превоз. За жал, мал број граѓани знаат дека доколку ги превезуваат диви таксисти, односно ако не добијат фискална сметка, можат да не го платат превозот.
Според Законот за превоз во патниот сообраќај, без соодветни дозволи и лиценци за работа, предвидена е глоба во износ од 500 евра во денарска противвредност. А такви, тврдат од Градот, ловат по триесетина месечно, односно би се рекло секој ден по еден. Тоа покажува дека инспекциските контроли треба да бидат позачестени.
