„Децата од воспитно-поправниот дом – Тетово кои се во затворот Охрид, примаат јака седативна терапија. Со оглед на возраста, дозата е многу силна. Поради јаките дози повеќето од нив немаат јасен фокус, делуваат отсутно…“
Ова е дел од извештај на Народниот правобранител. Тој се однесува на состојбата во која се наоѓаат децата од затворот за малолетници во Охрид. Според податоците до кои дошле претставниците на оваа институција, на малолетниците кои инаку таму издржуваат казни поради извршени кривични дела, им се дава седативна терапија препишана од матичен лекар од Здравствен Дом Охрид или од невропсихијатар. Терапијата се состои во повеќекратни дози во текот на денот, а особено навечер. Им биле давани лекарства за смирување, но од 5 до 20 милиграми дневно. Со оглед на нивната возраст, тоа е многу силна доза констатираа денеска и специјалистите кои ги консултираше Алсат.
„Принципиелно зборувам, доктринален став на сите големи школи е – во исклучителни случаи ДА, но кај деца да давате секој ден вакви лекови правите, според мене, голема, голема неправда или големо зло… Тоа е повеќе незнаење и ‘сакам да бидам мирен, да не се секирам, ќе дрогирам, но јас да бидам мирен’“, вели Проф. д-р. Методи Чепреганов, Невропсихијатар.
Чепреганов предупредува и дека е многу опасно ако се мешале некои од лековите.
„И замислете сега ако на едно детенце му дадам хелекс и дијазепам заедно, тие влегуваат во нова реакција со нов лек, Бог знае што ќе му направат во секундарните појави“, додава Проф. д-р. Чепреганов.
Алсат денеска го посети КПУ, односно затворот во Охрид. Од неговата управа ни рекоа дека тие не се виновни за ништо.
„…Воопшто не се согласуваме со тој извештај. Ние само постапуваме по извештајот на докторот специјалист, зашто веруваме дека е тоа така. Ние немаме ни право да се мешаме во однос на терапијата. Сите деца се во свесна состојба. Не знам како беше тоа презентирано дека дека ние сме ги дрогирале децата. Нема вистина во тоа“, рече Ристе Недески- директор на КПУ- Затвор Охрид.
Од здраствениот дом во Охрид за Алсат рекоа дека нивниот лекар кој оди во оваа казнена установа, исклучиво препишувал таблетарна терапија по претходен извештај од невро специјалист-психијатар од општата болница.
„Сите пациенти се дијагностицирани според дијагностички критериуми на користена 10-та интернационална класификација на болести и е ординирана терапија според медицина базирана на докази, според поставената дијагноза“, наведуваат од Општата болница во Охрид.
Директорот на Управата за извршување на санкции Јовица Стојановиќ вчера веќе извршил вонреден надзор. за Алсат тој денеска рече дека констатирале оти затворската управа нема пропуст во однос на давањето на терапијата. Инаку, од увидот во книгата во која се водат дневните терапии кои им се даваат на штитениците во домот, народниот правобранител при контролата во јули констатирал дека некои од нив не сакаат да ја примат дневната терапија. Од неа се чувствувале поспано и малаксано и оти не можеле да функционираат.
